HATA SO PISIK

Jangan, jangan, jangan

Tung mansai las rohani si Horas manjaha surat na ro sian UNS Solo, na paboahon dijalo ibana singkola disan. Songoni do nang amaniHoras, ba natua-tua nise naso las rohana tahe molo dijalo sada parsikkolaan alani hamaloon na, hut dibalanjoi pamarenta?. Dihatahon ma tu hombar bagas, jala tu sude donganna sapunguan di gareja. Alai, nata pe songoni, tong do mamilang-milang amaniHoras, “Boi do pasikkolahongonku buhabajungkon?”, ima ro tu rohana.

Alai, di ingot ma muse, hapogoson, hapariron ni ngolu na manombang di hauma ni angka sisolhot, tarsunggul ma turohana “Mauliate do dohonon tu Pardenggan basai, ala dipasu-pasu dope ianakkonhu, holan marhite parsingkolaan do boi malua sian hapogoson, anggiat si Horas muse boi manogu-nogu tinodohonna” ninna. Disura-sura onon taon na naeng ro, nunga tammat si Horas, dungi ro ma ibana tu Solo mandohoti wisuda. Jala sangkothononna ma gombaran nasida di dorpi ni jabuna asa di ida halak na ro martamue tusi, Horas Martua Manalu, SE.

*  *  *

On ma ari parjolo dung di Solo si Horas. Longang situtu do ibana mida ribur ni huta i. Anggo ninna, rumibur dope Medan, hape so piga hali tu Medan. Nda holan mamolus do sian Padang Bulan tu Belawan?. Ima goarna BTL, batak tembak langsung. Tutu ma nian ditomu si Jatikkos do ibana di pelabuhan Tanjung Perak, biar do rohani si Jatikkos molo tung lilu si Horas. Nidoppon rohana, bohama parhuta-huta ro mangaranto tu Solo, datung adong na tinandasa.

“Ho do i Ampara?” ninna si Horas dung di ida si Jatikkos
Marsihaolan nasida.
“Tamba uli do rupam huida, asing sian najolo i, opat taon naung salpu” ninna muse manguduti.

Dang sadia leleng nunga di pardalanan nasida laho tu Solo. Dipoda-podai siJatikkos ma ibana, boha mambuat rohani dongan, boha mangangkupi natua-tua. “Ai dang sarupa do hasomalanta, anggia dohot halak jawa on, lambok-lambok jala nanget do marpanukkun. Dang songon di DolokSanggul, ikkon marsurak” ninna

Dijaha si Jatikkos do surat nabinoanni si Horas, ima sian amanJatikkos, amana. Manetek iluna. Dia ma tutu dang sihol rohani amana molo nga apala opat taon dang pajumpa. “Saleleng so tammat ho anaha, dang boi mulak, ingkot haringkotanmu napasidungkon parsingkolaanmi, ingkon sarjana do asa boi degeonmu jabu on, ingot ma hinaloja ni amangmu jala parhaseang ma hodok ni inongmu” ima isi ni surat i.

* * *

Manogotna nunga hehe si Horas, lao borhat singkola. Dang tarhilala, tolu ari ibana di Solo. Andorang so borhat tu singkola, dipanotnoti ibana gombaran ni NaiHoras, inongna dungi padodot tu gombaran ni amaniHoras. Ah, tahe, saminggu dope dung hutadingkon, nunga tung masihol iba. Ninna dibagas rohana. “Ingkon do hugarar halojaonmuna on omak, marhite titel sarjana ekonomi, sabar hamu bapa dah” ninna ibana mangakkupi gombaran i.  Nian, holan sahat ibana di Solo, tor jalo do ditongos barita paboahon naung sahat jala pajumpa ibana tu si Jatikkos.

Dibolus ibana ma sigadis indahan. Ninna si Jatikkos, disi do parmanganan na ummura, ias jala tabo. “Buk, makan” ninna si Horas
“Monggo, mas…” ninna unduhunduk hut dipatudu, asa hundul si horas.

Holan indahan do dilean, anggo ikkan nang ingkau sibuat jala sipillit do. Ima ninna partiga-tiga i. “Ini jangan, ini juga jangan, ini juga…” ninna inanta partiga-tiga i. Marpingkir ma siHoras, dungi naeng dibuat muse na asing sian i

“Oh, itu juga jangan nak”
“Iya bu, maaf” ninna siHoras
“Kalau ini” ninna muse, hut manudu sipanganon na asing.
“Itu juga jangan, …”
Dungi dibuat si Horas ma holan tahu tempe.

Songoni ma dua ari. Alai sungkun-sungkun do dirohana, boasa diorai buatonna sipanganon i, hape nga diparade. Manang nan diboto do dang tabo tu dila ni halak batak?. Sude jangan, ninna dibagas rohana. Dungpe patolu arihon disukkun ma siJatikkos, boasa sai diorai mambuat ingkau i. Mekkel do do siJatikkos paboahon, ai lapatanni jangan ima ingkau. “Jei molo dihitaan didok ingkau, dison didok jangan”. Tippas halak!

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s