Beranda » Kategori » HATA SO PISIK » Si Marbun Tekap

Si Marbun Tekap

Alai suhutan dihita ma jo on, iban na so ise do hamu asa hupaboa, ai holan tu hamu do husuhuthonon. Namartaringot do rupani di pargulmiton ni ngolu ni halak hita di huta naribur, Jakarta on. Ra, jotjot to tabege pandohan ima, PAR. Ala hurang denggan do molo dijouhon goar sidanak dihita halak batak rupani, gabe ditambai dongan ma muse songon identitas tu halak nanidokna i.

Ai molo holan marga do didok, iasara si Marbun, Situmorang, Silaban, ra olo do disada inganan manang parkarejoan, godang na samarga. Ido alana gabe adongma namargoar Si Marbun Par-Kebun Jeruk, lapatanna si Marbun na maringan di huta Kebun Jeruk. Adong muse dope na geokna, tarbarita do ibana si Marbun Narkoba, datung ala na narkobaon. Habalikanna, begu ni narkoba do ibana, ala polisi bagian narkoba. Ai molo holan si Marbun Polisi do, ba godang do Marga Marbun polisi. Jei holan ro appara on, tor hambur do sude angka parnarkoba i.

Dihutanami, di Pakkat, umbotoan do loloan di goar si Meha Namatua sian Amani Mangisi,–bapatuaku do on–, alana di parkarejoanna adong dua marga Meha, sada antar na poso pamatang na, jala bapatuaon nunga tumua. Imajo tusi!.

Dungi, jotjot binege muse, si Marbun par-Pondok Indah. Molo diarisan, sai dipaima do bayon. “Ai jolo ro ma jo dah, si Marbun Par-Pondok Indah, asa ta pungka ulaonta” ninna nadeba. Hape molo si Marbun par Cikarang do manang si Marbun par-PuloGebang, tor didok dongan do “mandapoti ma nasida, marsipanganon ma hita”, ninna.

Di hami angka supir, tarbarita do si Marbun Par Pe Pe De, ia so i si Marbun TAIMER,–timer ima na manjalo karsis ni bus di terminal–. Jei adong do muse si Marbun Togel, dang haru binoto ala niaha didok songoni.

Molo didok halak si Marbun De Pe Er ninna, nga sude umboto i, na oppuJatikkos ma halakna. Agiape holan alani Pe A We –pergantian antar waktu- do ibana gabe dapot anggota dewan, satonga taon nai, tarbarita do tu desa na ualu na si Marbun De Pe Er do ibana. Ai boasa pola songoni tarbaritana?, huroa hatiha diojakhon ibana manggantihon donganna naung jumolo lao tu haroburan i, dihara do saluhut dongan tubuna, sian si Marbun Togel, si Marbun Narkoba, si Marbun Timer, Si Marbun Pengacara, si Marbun par-Pondok Indah, Si Marbun Hakim, Si Marbun Par-PuloGebang nang si par Pe Pe De.

Hea dibege hamu si Marbun Parjagal Biang?, nang pe nunga gabe tokke boras jala anggota dewan natua-tua on, alai anggo goar si Marbun par-Jagal Biang, sai tarbarita do. Najolo ninna, dihuta i adong do dua marga Marbun, sada ma ibana, jala ulaonna martiga-tiga jagal biang. Alani haserepon, nang hanunutan ni na mulaulaon gabe manjadi ma niula ni tanganna, sian namarjagal biang, gabe boi margorosis sembako, ujungna gabe sahat tu na tokke na bolon, nang gabe anggota dewan. Alai anggo goar i, dang boi be maruba sian si Marbun Parjagal Biang, gabe si Marbun De Pe Er. Mardomu dang boi dua si Marbun De Pe Er, ai nunga jumolo OppuJatikkos dapotan goar i.

Tar sar do goar ni ibana si Marbun Tekap. Najolo, tingki tarbarita jala sihabiaran dope ABRI, godang do halak marpahean songon ABRI jala mamangke pahean na suman tu tentara. Ia bayon, adong hasurunganna, pamatangna todas, na timbo na bolon, jala obutna sai songon ABRI ma potonganna, ido gabe digoar halak ibana si Marbun Tekap.

Diboto hamu do tahe lapatan ni Tekap?. Ai aupe so huboto!.

Akkahitir do tot ni jolma molo nunga maralo tu si Marbun Tekap on. Molo sahali dope pajumpa, ba dang lao roha naso tekap ibana. Pangkasan ni obut, cepak –istila saonari–, jala paheanna sai dipillit do, ia so safari na birong, na cokalat.

Marganti do partingkian, diari naparpudion datung haru godang be jolma pasuman-sumanton tentara. Jala, nunga godang ni ida na di tangkup halak na olo pasumn-sumanton tentara i. Songoi ma nang si Marbun Tekap, nang pe goarna sai tarsar dope si Marbun Tekap alai anggo pahean nang obutna nunga tung asing be.

Pajuppa ma dohot amaniTuason, donganna saparmeaman najolo. Sampulu lima taon ma dang pajumpa, ra godang do naung maruba sian nasida be. Dungi marnonang ma nasida disada lapo, pasombu sihol, dinamarale-lae. “Las roha mida ho lae, Marbun Tekap, alai adong songon na asing, gaya ni pahean nang simanjujung i, dang suman be tekap” ninna amaniTuason

“Unang sai jou be, Marbun Tekap” ninna jempek mangalusi

“Boasa lae?, ai ido nabinoto goar muna, jala di hatuahon hamu do huida, manjadi angka naniula ni tanganmuna”
“Olo ma dah, najolo namai”
“Na bohado huroa?”
“Ah, nga marputor be portibi on, nga di toru be sorha ni padatii” ninna
“Ai singon na porngis do huida” ninna amaniTuason
“Imadah, najolo memang si Marbun Tekap do iba, alai saonari nunga mago be KAP na i” ninna mangalusi.

8 thoughts on “Si Marbun Tekap

  1. Ai gabe songon na dalle do pangujungi nai bah…. hape somalna akka na tabo do parujungan, ibban na didok: “Sai sumurung do na parpudi”…
    Hape on ……. ah dak kuboto bei…

  2. Di kampungta adong do muse namargoar ucok Teleng tai nada huboto sanga aha so didok halak songon i , dungi muse amang ni ibana didok halak muse si kotuk tai sanga ahape kotukon nada muse binoto . jadi si Teleng ima amang nia namargoar si Kotuk . tai dung simbur magodang ma pamatang ni si Teleng jadi ia doma dibaen halak namargoar Si Kotuk. jadi diturunkon juo do goar i

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s