Beranda » Kategori » HATA SO PISIK » Sala Kontrasepsi

Sala Kontrasepsi

Sai dipodahon tu ripe nabaru marhasohotan,–  hatiha sijou nasida marsipangangon, manang didok “dipio”–, ima asa unang marnaloja marsiajar di parrumatanggaon. Marsianjuan di nahumurang jala unang gotas marroha di nasaripe. Unang adong hata “sirang” haruar sian pamangan jala unang hatop mangalu-alu tu natua-tuana be. Dipodahon do, molo dung marrumatangga, tung mansai godang do parungkilon, godang abat-abat jala olo do halak mangela-ela ripe asa tubu parbadaan.

 

“Molo masa parungkilon, unang tor tu hula-hula hamu mangalu-alu, sitongka do i, tarlumobi tu hamu inang parumaen, dang denggan songoni. Ido anggo ruhut ni parrumatanggaon di halak batak. Hope antong, Anaha, tong do songoni, dang sai tor tu hami paboaonmu molo adong parungkilon di rumatangagmuna. Si jumolo ma pasidung hamu angka parkaro na adong dihamu marhite na masisukkunan, marsipalambasan roha”. Ima poda ni amanJatolhas hatiha mamio si Jatikkos. Sai dihasomalhon amanJatolhas do ulaon mamio on tu saluhut sisolhot na apala jonok dope. Jala tingki mamio on do boi denggan manghatai tu ripe naposo i. Anggo hatiha di ulaon unjuk i do, hurang do tingkin mandok hata poda.

 

Tingki sisaonari on, dang apala dianturehon halak batak be ulaon sisongonon, didok dang adong tingki. Hape, aut sura ma diboto be aha lapatanni ulaon on, ra dang adong hata “alani tingki” dang tarpatupa.

 

Tutu ma nian, dang sadia lelang dope marrumatangga, nga tubu parsalisian di ripe ni si Jatikkos. Ra, lupa do nasida dipoda ni natua-tua naung hea dipodahon tu nasida. Tar sar do parbadaan i tu hombar balok. Hape tung hantus do didok amanJatolhas, asa molo masa parbadaan dang boi tarbortik tu hombar balok, ai hailaan do i. Tung holan soara nagogpe sitongka do.

 

Dijou amanJatolhas do si Jatikkos tu jabuna, ninna rohana lao mamodai nasida.

 

“Dang songoni antong, Anaha, ingkon serep do roha jala olo iba manganju rumatangga niba” ninna, dungi ganjang ma hatani poda ni amanJatolhas.

 

“Ido, Amang, satohona soada siparsoalhononhon do anggo anakmunaon” ninna si Ros, parumaen ni amanJatolhas, nioli ni si Jatikkos, jala didok ma NaiHarapan.

 

“Dia do tutu, patorang hamu ma jo, Inang””Olo, Amang, na sala kontrasepsi do hami””Bah, holan alani i do hape? jei holan alani kontrasepsi do?” ninna amanJatolhas, marrara bohina mambege alus ni parumaenna.

“Ido amang, nidok nion, hape ninna anakmuna dang songoni, jei dang marsitomuan””Ai dia do tutu ho amaniHarapan. Alai boasa tor markontrasepsi hamu, soadong dope pahoppu” ninna NanJatolhas manjahut pakkataiaon nasida i.

“Ah…dia do tutu inattaon, sala persepsi do maksud ni parumaen mon, nanguda” ninna siJatikkos mangalusi. Dang tartahansa engkelna, alai anggo naiHarapan dang tarpaidasa be simatuana, amanJatolhas.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s