Beranda » Kategori » HATA SO PISIK » Tangiang na sala….

Tangiang na sala….

Ido asa sai didok natua-tua, ia dakdanak i tiruanni natoras ma i. Molo hasea jala burju anakkon i, marguru tu natoras na do, alai molo so hasea, jungkat, hurang marpangalaho, tong do marguru tu natorasna. Ninna namalo, sai songon harotas na bontar do anggo dakdanak i, manang aha pe boi do tasurathon disi. Molo na denggan do sinurathon, ba na denggan ma jahaon, alai molo na roa do nisurathon, ba naroa do jahaon.

Ai nda songoni do amanJamordong?. Sai dipasomal-somal ibana do mangajari si Jamrodong marhite parniulaan. “Ai molo holan poda do bianaen, olo do dang boi songon na hinaraphon i diula dakdanakon” ninna ibana. Tutu ma nian, sai jolo martangiang do ibana laho mangan, jala martangiang laho modom rap dohot siJamordong, buhabaju panggoaran i.

“Molo tipat jala ture do anak sihahaan on, boi ma innon ibana gabe mangajari tinodohonna, gabe sada anak sitiruon tu tinodohonna na dua nai” ima ro tu bagasan rohana.

Dung disimpul marsiajar botari na, diarahon ma siJamordong dohot anggina na dua i, martangiang lao modom. Sai jumolo do  amanJamordong martangiang, dungi diihuthon anakkonna ima. Ai molo holan didok do asa dibaen tangiang, ro do alusna mandok “Bapa ma jo mambaen”.

“Mauliate ma di Ho Tuhan pardenggan basa ala dilehon ho do dihami hahipason manipat na sadari on, on pe ale Tuhan, dinalaho modom hami, homa na mangaramoti hami….amen” ima tangiang ni amanJamordong ganup botari.

Dungi dinalaho mangan pe nasida, marsingkat soring do martangiang. Sipata nanJamordong, sipata amanJamordong. “Mauliate ma di Ho Tuhan pardenggan basa ala dilehon ho do dihami hahipason manipat na sadari on, on pe ale Tuhan, pasu-pasu ma sipanganon na rade dijolo nami, …amen” ima tangiang ni amanJamordong ganup mangan.

Disada tingki dipamasa weik ma partangiangan dijabuna. Jala hatiha i, adong do tangiang sian namanjabui. Tontu sahali datung gabe hamaolon i di amanJamordong, ai somal do ibana martangiang. Dang songon halak rupani, holan ala ni mambaen tangiang dang ro tu partangiangan. Manang sai dipeleleng mulak sian ulaonna asa jolo martangiang inantai dapotonna. Mabiar mambaen tangiang.

Tep ma di tingkina, dibaen aman Jamordong ma tangiang sian namanjabui, hehe ma ibana marloppit tangan, ninna ma “Mauliate ma di Ho Tuhan pardenggan basa ala dilehon ho do dihami hahipason manipat na sadari on, on pe ale Tuhan, namarningot do hami diangka dongan nami naso boi ro dope marsaor dohot hami dibotari on…”

Holan dibege songoni tangiang i, pintor jonjong ma siJamordong sian hundulanna didok ma “Bapa, Bapa, nga sala tangiang mi dang songoni…” ninna tung gogo. Humordit na umbegesa, hut gabe gotap tangiang. Sukkun-sukkun do rohani aman Jamordong didia parsalani tangiang i. Didok sala ala asing sian tangiang na somal. “Sala..sala…nga sala bapa tangiang mi, dang songoni” ninna siJamordong hut mekkel sahalakna. Dung pe dielek, asa so. Jala dung simpul partangiangan i, dipatorang ma aha nanasa.

2 thoughts on “Tangiang na sala….

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s