Beranda » Kategori » HATA SO PISIK » Salapsap Tuak

Salapsap Tuak

Ra, dang sala iba mandok molo di ganup ulaon, nabalga, nametmet, ulaon dialaman, di jabu, di arisan, sai tor minginsurut do tu pudi angka dongan sundut naumposo dung dapot tingkina manghatai. Sai tor holsoan do, atik boha tugan  mandok hata, mambaen tangiang nang na asing. 

Songon iba rupani, sai pinajuguk do parhundulon molo masa marulaon, manangi-nangi angka hata ni natumua, dang ro tu rohaniba, olo gabe suruon manghatai. Ra, angka natumua na hundul dijolo pe diboto doi sian pamatang niba na poso dope.  Ai na pasomal-somalhon manangi-nangi do dalan marsijar.

Ninna dongan, hata  do sitiopon sian sasahalak, jala ido na gumomos sian saluhut na boi mangihoti, isara andor, hotang, nang na asing. Tutu ma nian, molo masa sada ulaon, sai ingkon ris do jambar nasadaon,–jambar manghatai– tu gannup na ro tusi. Ai hurang do tamana molo dang pinangido hata sian dongan na sahundulan i, lumobi ma molo namardongan tubu.
Nang pe rupani sai tor hata na somal do dipandok be “Mauliate ma amang, ninna roha sahata ma hita”. Adong muse mandok “Sada silompa gadong ma…” ninna. Sian pandohan na jotjot binege saonari do i  “sada silompa gadong, sada silompa ubi, sada ma namanghatahon, sude mandok nauli” Ai dang haru binoto umpama sian dia on, ai so ditanda halak batak UBI, gadong do saluhut ditanda.

Sai tor amanJatikkos do ditudu nasahuta molo apa didok mandok hata, pasahathon hata mauliate tu namanjabui, dimasa ni parpunguan parsahutaon. “Sitombol ma”, ninna na deba. On pe sobinoto manang nandigan masa hata sitombol on dipanghataion, nabinoto tu hepeng, sihumisik do didok sitombol, parjambaran  nang na asing. Anggo dihata, datung masa hata sitombol.

Ro muse amaniPartogi didok “sada silompa ubi ma amanguda, baen ma sian hita…” ninna i. Tong do asa unang dibaen ibana nanggo sakkababa, sidalian.

Sai amanJatikkos do ditugan mandok hata, ai arop do roha ni na sapunguan alai imana natumua. Naung martarup seng simanjujung,–ubanon– jala bolak pardompahanna, manang salapsapon. Alai ala sai holan ibana mandok hata, ujungna muruhan ma ibana, dok ma “Sumalim do hamu huida, sai holan au, sai holan au, dang hea iba. Dirippu hamu do salapsap nang uban on patudu hatuaon?, asa diboto hamu dah, salapsap tuak do on, nang uban ni parmitu” ninna ibana.

“Manang unang pe taho, masihohom hita saborngin on” ninna, huroa na mulak sian lapo di ibana ro tu punguan i, jala ido alana gogo soarana mandok.

Sianima gabe digoari ma amanJatikkos, si SalapsapTuak.!

6 thoughts on “Salapsap Tuak

  1. Dang adong hata “ubi” dihata batak. Jadi natingkos: “Sada silompa gadong, dua silompa puli” (sejenis getah) dang boi sahalak mangalompa puli alana ingkon adong do khusus namaniop pangalompaanna i ala longkot do i. horas

  2. Horas Lae.
    Taringot umpasa ‘sada silompa gadong dua silompa UBI’ .Toho do sungkun-sungkun munai ai dang adong hata batak UBI. Molo na hea hujaha, nasintong ima. ” sada silompa gadong dua silompa PULI”. Ai molo mangalompa gadong boi sahalak, alai molo mangalompa PULI somalna ingkon dua halak do, molo dang dua halak hurang sempurna mutu ni PULI i. mauliate. manihuruk

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s