Beranda » Kategori » True Story » Marlumba mangan Gadong

Marlumba mangan Gadong

Jam dua siarian ma iba mulak sian singkola. Pinahatop ma marlojong, nihadang hajut singkola,-tas- on jala sipata ma marlojong mangite gadu, asa gumira sahat di jabu. Alai, olo do sipata, dang pas ni dege batu i, ia so i, nidege do denggan alai ala na ipe digadui ba magulang manang runsur batu i tu sabai, laos dohot ma iba lumop. Molo nunga lunop sipatu tu gamboi, hatop ma nidadap tu bagasan, laos gabe margulu gambo ma sude. Dungi sinarat-sarat ma mulak. Nga rade iba hona songgahan ni dainong, “Ido…..tudia do matami dibaen ho, dan ho loja antong manussi baju mi, adong hatobanmu” ninna hut hona gotil.

Sai humatop do iba mulak singkola ari selasa, alana tabo dope lompan,–ikkan asin—disi dope sude sian ihurna sahat tu uluna. Alana ari Senen manang ari Sabtu do onan. Molo nunga ari jumat, olo ma tading holan ulu di hajut panangkotan ni dengke asini, alai ipe pinarar do i. Dang pola marganti pahean, na bontar-narara i do pinakke, dungi sinigat ma hudon. Geokna, dang binoto, nga sap getong ni hudon on tu baju-baju i, hape pinangke dopei marsogot. Olo ma ingkon dongan patuduhon tu iba, “ai na dihaol ho do hudon i modom?” ninna.

Molo hudon najolo, margetongi, birong jala ditataring do. Adong do tanda-tanda nion. Molo di para-para do disangkothon hudon on, lapatanna adong ma dengke asin di bagas. Idodah, molo dibaen di tataringi, olo diungkap huting laos disarathon ulu ni dengke asin i. Jala molo ditataring do dibaen, namarlapatan ma on, gadong ma tugo arian on.

Tutu ma nian, holan niungkap hudon naditataring on, tarida ma gadong mengkel. Hudok ma goarna gadong mengkel, alana bilha do gadong on hira jolma na mekkel, disi muse ma marlaok dohot sayur nanibebe, ima ingkaurata. Dang tor hupangan gadong on, ai hasomalan ni daompung nahinan, dipamasuk do tu baskom-baskom indahan dungi dibungkus ma muse dohot salimut/gobar, asa sai las .

Mula-mula nai, sasendok do antong binuat indahan na mohop on. Alai alani malena, gabe lobi sian tolu sendok. Geokna, dang holan au songoni, dohot do tinodohonku, sude ma songoni, masiahut dimana be.

Diboto hamu do?, ai tugo ni bapa do i. Ia among hu guru do, alai holang do parsingkolaanna sian huta nami, ingkon mardalan ma iba onom tu ualu kilometer, mannangkohi dolok, nang mamolus harangan, goarna Banuarea. On ma huta najumonok tu langit, apala di bona ni Dolok Pinapan i do, jala alani i do ra asa digoari huta i Banuarea. Jam opat botari annon, mulak ma damang on sian parsingkolaanna, dungi laos dihobasi muse tu saba, manang tu tombak, mamear tingki sajom dua jom nai.

Hea do huingot mamboan tugo damang on tu parsingkolaan, jala disi ma mangan, alai dung di parpudi on, mangan dihuta nama. Martugo jam opat potang ari.

Dung pe diungkap ompung sitabunianon ni indahan on, tarboto ma, nga tading saotik nama indahan i. Hata saonari, suriga do ompung on mida hami. Saotik do antong dipangan gadong sian hudon na ditataringi, alai dang adong mandok male.

Anggoi pe dah, marsuraka daompung on, “Peeeeh…dang diajari gurum ho diparsingkolaanmu, marisuang nai ho singkola sada-sada. Nanggo pasangaphon natua-tuam pe dang diboto ho, dang motammu. Peeeeeh….”

“Ai ahai, Ompung, marsurahi ho?”

“Ahai ninna babam dope, hodope sada, suda indahan ni bapa dibaen ho deba-deba”

“Ba molo suda, ta lompa muse”

“Ido, imban na gabe hamu, dang diboto ho na suman”

 

Ima sai nidok ala piangan indahan on. Didok muse ma, anggo hami najolo, sian manogot tu botari, sae do mangan gadong, jala dungpe sidung mangan gadong asa pinangan indahan, ninna.

“Dang jolo marpanukkun babam” ninna muse hut ma digotil iba, jala sai marbete-bete ma ompung naburju on, hut ma di aroi hudoni, ai gabe dilompa do muse.

Jei sai dihasomalhon daompung on do, molo siarian, sai jolo martugo gadong do ipe asa mangan indahan. Dibaen do aturan, “manang ise na gumogo jala gumodang mangan gadong, di ibana ma gumodang indahan”.

Ala oto dope iba najolo, ni hajap ma mangan gadong on, asa haru godang diiba indahan. Hape molo piningkiran, dia be boi mangan indahan molo nga pinangan godang gadong?.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s