Beranda » Kategori » TORSA » Pasarung Pidong mi….

Pasarung Pidong mi….

Datung na pahata-hata sintuai iba, sitongka. Alai molo nga geok, nda boi do paboaon tu hombar balok, asa dohot mengkel umbegesa?. Unang mangingongi tu rohamuna, manang sungkun-sungkun, diluat dia do naeng suhutan ni amani Partogi naditoruon. Nang pe adong na manulingkit, mandok, di huta Lippo Cikarang, alai dohononhu ma, dang dihuta nami on. Ai namalo jala naburju-burju jo sintua di hurianami. Molo na ringkot ingkon botoon muna, ba ro hamu tu Cikarang, hupaboa pe. Atik alani on, gabe tarhirim rohamuna ateh, marsahit muse ma, iba irsak!.

Borngin, dung pungkul ualu botarina, marsangkap ma angka dongan sintua lao mamuhai ulaon partangiangan passion, ima partangiangan tolu borngin andorang so ari hamamate ni Tuhanta Jesus i.

AmanJatikkos, sahalak sintua namatua ma maragenda. Sintua na ringgas marhuria jala naburju tobok. Najolo, najolo do dah, dang saonari, ninna roha sampulu taon na salpu, andorang so dipabangkit ibana gabe pangula ni huria, hallang do marhata batak. Dang tiala iba, ai nunga marbonapasogit di Lampung amanJatikkos on.

Maol do manjaha hata batak on. Haru iba naung sorang jala magodang di bonapasogit olo do marputoran hata batak i jinaha, lam amanJatikkos ma?. Sai dinunuti ibana do marsiajar hata batak asa lam tingkos, songon panggoaranna i. Dang marnamalu rohana mandokhon nabinotona, jala dang mansohot ibana marguru tu donganna sintua.

Molo nga didok partangiangan passion, sai tor manindang do randorung. Sude do ruas i paundukhon roha, sip, jala martangiang dibagasan rohana be. Dungi muse, logu ni ende pe taringot tu hamamate ni Tuhan Jesus do. Pola do holan soara ni putor-putor ni kipas angin i habegean dibotari i, alani hohom na namarpartangiangan i.

Mangkuling do poti marende nanget angon-angon, jala sude do naro i mersitutu majaha piga-piga ayat sian bungku nabadia i songon naung tarsurat hian di harotas naung tiniopna be.

Palobi ma tahe amanJatikkos, sai sipata songon na diangon-angonhon, diambalhon do soarana, marligato, sipata nanget, sipata gogo, sipata songon nanaeng tangis sipata songon na momos diondolhon, manjahahon naung tarsurat diharotas i,–buku acara, red–i sian langgatan. Tung pe dang haru pas hata batak i, alai anggo begeon, tung tabo ma tahe. Hatangku nadiginjang,  manindang randorung.

Sian opat lampu listirik, mintop ma dua di langgatan i, gabe sai hira na ramon-ramon ma idaon. Dang tiala iba, saleleng on, holan siarian do marulaon di gareja i, jei hurang diparrohahon do sinondang ni lampu i dung botari. Lungun ma tahe idaon namasa i. Pola do piga ina, naung mangapusi iluna holan mambege sude najinahahon ni amanJatikkos i.

Alai dang piga dan nai, tompu gear ma natorop mengkel umbege amanJatikkos manjaha natarsurat di harotas i. “Dungi ninna ma tu siseanna i, pasarung pidongmi, ai na manintak pidong, mago ma bahenon ni pidong…”

Meret sada-sada ma dongan ama tu duru, papuas engkelna. Dang tartahansa be alani geokna. Dung lam leleng, diboto ibana ma naung sala do hape najinahana i, ai mandok  “Pasarung podangmi, ai na manintak podang, mago ma bahenon ni podang…”. Marrara ma bohi ni amanJatikkos. Hohar partangiangan alani i.

10 thoughts on “Pasarung Pidong mi….

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s