Beranda » Kategori » TORSA » Hajajadi ni Mas di Dolok Pinapan

Hajajadi ni Mas di Dolok Pinapan

pinapanSai ni ingot do najolo, tikki met-met iba, marsuhutan manang marturi-turian daoppungon dungkon siborngin, alai sai jolo hut ma nidampolan pat na. Sada ma di pat siamun, sada dipat hambirang, sada di tangan siamun, sada dihambirang, dungi sada ma ditanggurungna. Dungi dimulai ma namarturi-turian on. Dietong nunga mondohondok iba, jala dang margolle be tangan on, dipasae ma nang suhutan on. Modom ma, huhut ni bayangkon aha namasa nadi suhutan i. Sipata olo do gabe suhutan i nipi niba.

Di nasadari songon na somal, andorang so marmodoman be, marturi-turian ma muse daompung on, ima taringot tu na martinodohon, tung naso jadi marsilatean jala marsihosoman.

Najolo ninna, di jaman na, disada huta di toru ni Dolok Pinapan, adong ma dua halak namartinodohon. Sada ma i digoari si Lingga jala tinodohonna namargoar si Purba. Ndang namandok marga lingga dohot marga purba, alai ido goar ni nasida nadua. Nasopot somarama sopot somarina, molo dihata sisaonari didok ma nasida na yatim-piatu. Ianggo ngolu siganup ari, holan sian na nilehon ni halak do asa mangolu. Sipata ma nasida lao mangula tu saba ni dongan sahuta.

Alai sipata ma molo so adong ulaon di luat i, mangalului hau baen soban ma nasida nadua tu tombak, dungi digadis nasida ma manang ditaruhon ma soban na binoanna on tu jabu ni akka namora i, dungi dapot dahanon ma nasida manang na gadong. Ima di loppa gabe balanjo nasida. Tung naporsuk ma tahe parngoluon i, boi ra tabayangkon bohama halak naso marama-so marina.

Diasada tikki, masa ma haleon potir, sude akka hauma saba dang adong parbuena. Diluati, sude do mar hauma saba. Tambana, ba marhaminjon ma di Dolok Pinapan. Sega ma partaonan binaen ni logo ni ari, dang adong aek lao tu saba. Atturaparon ma jolma saluhutna. Jala akka eme nang boras na disimpan di hoddang na be lam leleng lam suda. Hape anggo berengon nian namasa on, dang na ra sidung dope las ni ari on. Godang parhuta i lao manombang tu luat ni deba.

Bohama si Lingga dohot si Purba?. Ia naeng lao nasida mangihuthon donganna sahuta, dang adong na olo mamboan. Molo najolo hatiha denggan dope partaonan, olo do angka hombar jabuna mangalean gadong lao allangon nasida, hape saonari dang adong be. Nunga sude be tahe marsikkor dibahen haleon on.

Nunga tung tamba tahe porsuk ni pakkilaan nasida, ai sipata holan sahali nama nasida mangan dibagasan dua ari i, ipe holan mangallang gadong do.

Dinasadari, didok si Purba ma tu hahana i, “Ua loppa majo gadong i abang asa adong allangon, nunga tolu ari iba naso mangan on” huhutma marhusor ibana sian podomanna saotik, alai dang tarsarat na be patna. Marsahit boltok ma si Purba ala so mangan. Tung mansai asi ma rohani si Lingga tu tidodohonna i, madetuk pangkilalaan, bohama na samudar on, alai bohama baenon, tu ise ma lao mangido gadong asa adong loppaon.

Manang songon dia pe tahe, asa lalap anggikkon, hubuat ma batuon, huloppa ma, ima ro tu pikkiran ni si Lingga. Dungi dibuat ma batu nasa pohul-pohul, dibaen ma tu hudon i, dipagalak ma api jala diloppa ma batu on. Sai digor-gori nasida apii.

“Nunga boha abang gadong i, nunga masak? dang tartaon au be siubeon on”
“Dang dope anggi, paima ma satokkin nai, ai pir dope”, huhut ma songon na disigat batu isi ni hudon on. Tumatangis ibana mamereng tinodohonna na marsahit i.

Dungi, dang lelelng, disukkun muse ”Nunga boi allangon gadong i, Abang?”.
“Tokkin nai hian ne anggi, ngaltek dope, papodom ma jo satokkin nai” ninna si Lingga mangalusi.

Huroa ala ni malena, jala ala ni ngol-ngol na paimahon batu naniloppa na on, tarpodom ma nasida nadua. Dungi rap marnipi ma nasida nadua. Di nipi na i, ro ma sada namatua-tua mandok tunasida ” Ua laho ma hamu martangiang tu pussu ni Dolok Pinapan an, martangiang ma hamu tu Mulajadi Na Bolon, pangido hamu ma nasa sipangdoan muna, dungi lehononna ma dihamu”.

Tarsunggul ma nasida, rap marsipaboaan nipi ma nasida na dua. Ninna si Lingga ma mandok anggina i ” Beta ma taulahon anggia, songon nanidok ni natua-tua i, atik boha tahe adong nanaeng lehonon ni Namarhuaso i, huompa pe ho annon“

”Beta ma tutu abang, dang sai binoto i, atik na toho do pandohan ni natua-tua i.”

Borhat ma nasida nadua mannakkohi Dolok Pinapan i, huhut masitogu-toguan, maru dang diingot be namale. Anggo di roha nasida, bohama asa hatop sahat jala asa martangiang nasida, atik boha tutu adong lehononni namarhuaso i tunasida.

Sai didalani ma, sipata maradi, sipata dioppa si Lingga anggina i laho nakkok tu ginjang. Dung sai didalani, sahat ma nasida tu pussu ni dolok, jala ditatap nasida ma dompak rura.

–Kalau kita memandang kearah barat, maka laut Barus menjadi pemandangan yang sangat indah sekali, terlebih pada saat sun-set, panorama indah itu akan menghampar dihadapan kita. Horison seolah dilukis, untuk dinikmati setiap orang yang berada di puncak tertinggi Dolok Pinapan.

Memandang arah Barat Laut, akan terlihat pegungungan Bukit Barisan yang berbaris indah, terhampar dipelupuk. Dolok Pinapan adalah salah satu gunung tertinggi di gugusan Bukit Barisan. Dengan tinggi 2037 meter DPL, menjadikan Gunung ini selalu diselimuti oleh awan putih disetiap harinya. Biasanya para pendaki gunung ini akan mulai petualangannya di pagi hari. Menjelang siang, puncak gunung ini akan diselimuti oleh awan putih yang tebal. Banyak Rotan tumbuh gunung ini, juga tumbuhan siborutiktik,– semacam bayam liar–. Sayuran khas dari dolokpinapan. Rute pendakian yang biasanya dipilih adalah dari Banuarea dan turun di Batu Nagodang. Selama pendakian, anda akan dihibur oleh suara Imbo–Siamang Hitam– yang menurut beberapa peneliti, komunitas hewan liar ini masih banyak disana. Bagi masyarakat di sekitar kaki gunung Dolok Pinapan, suara Imbo ini bisa menjadi pertanda. Pertanda baik dan pertanda buruk.—-

Dungi dipukka nasida ma martangiang, huhut ma disurakkon nasida asa dilehon tu nasida manang aha pe taho naboi allangon nasida.

Sian sajom, gabe dua jom, tolu jom dang dihilala nunga opat ari na sai martangian nasida, manjouhon tu mula jadi nabolon. Di palima arihon, dung bollang matanasida na dua, dibereng ma dijolo nasida mas na mansai balga situtu, pola do olat ni nasa Ulu ni Hoda balgana. Humordit jala mansai las ma roha nasida memereng i, dang dihilala namale, marsurak jala manortori ma nasida mamereng balga ni mas i.

Dung loja nasida namanortor i, si Lingga ma tu anggina i ”Dison ma jo ho anggia, asa laho au tu huta, laho mangalap sipanganonta. Asa adong gogonta manghindat mas on,” ninna hut ma ditpik saotik baehenonna manuhor sipanganon.

“Olo abang, lao ma ho hupaima pe dison, jala boan ma lanja-lanjana, asa boi taboan mas on tu huta” ninna si Purba mangalusi.

Dungi borhat ma si Lingga, jala nunga tung mansai las rohana.

—-“Dalam kitab suci orang kristen dikatakan, sumber dari segala dosa adalah Cinta Uang”—-

Sipata, arta i do mula ni hasesega. Dung adong arta i, disima mangula sibolis mambaen jolma i mangulahon akka naso ture. Ai sian arta i do mula ni pargulut-gulutan, parbada-badaan nang angka ula-ula naso hinalomohon ni si tigor roha. Ala ni arta do olo gabe ikkon mardomu di tano rara namartinodohon, jala ala ni arta do sipata gabe dang arga hosa ni jolma.

Nang soingoni do si Lingga dohot tinodohonna si Purba.

Dung lao si Lingga tu huta mangalap sipanganon, diela-ela sibolis ma ibana, asa didokma ” Ah,…seang nai tahe bagu duaon mas on, nda tumagon ma holan diau? boha ma akkal asa unang dohot be si Lingga mambagi arta on?”.

Marpingkir ma ibana, dibuat ma hau-hau, di okkal ma tano, dibaen ibana ma lohung-lohung na bagas, jala dipambaeni ma disi akka runja-runja na tajom, asa molo mardalan innon haha na i, tarlombang jala masuk ma tu lombang naung binahenna i, dungi mate ma. Dungi di ibana sandiri ma mas nabolon i.

Hape, si Lingga pe tong do disonggopi sibolis i namandok ” Ah….holan di ho ma mas i, ai hodo na ulloja mangopa anggimi tu ginjang, jala tangiangmu do na diturehon namarhuaso i”.

Serom sibolis i ala dioloi do pangidoanna. Dungi lului ibana ma akkal laho pamamatehon anggina i, dibaen ma rasun tu sipanganon i, ai dirohana, dung diallang si Purba innon sipanganon na binoanna i, mate ma ibana dungi holan di ibana ma arta i.

Ima ditahi nasida be dibagas rohana.

Dang sadia leleng, sahat ma si Lingga muse tu pussu ni doloki, jala dibereng ibana ma tinodohonna i nunga jonjong disi paimahon. Marsurak ma ibana paboahon harorona i didok ma ”Nunga ro au anggi mamboan sipanganon” huhutma marlojong. Naso panagamanna, tarjollung ma tu lohung na bagasi. Ribak ma butuhana tu ruji-ruji natajom i, laos mate satokkin.

Disi dibereng si Purba nunga mate hahana i, mekkel ma ibana manortori. Ddadapothon lubang hamatean ni hahanai. Las ma rohana, dibuat ma sipangnon naung binoan ni si Lingga. Dipangan ma hapogan sipanganon i. Alai dang sangka rohana jala holan ibondut sahali dope nunga pittor peak ibana jala pittor mate.

Dilaon-laon ni ari dung lam leleng, sadari, dua ari sahat tu namarminggu-minggu, dungi marganti taon lam sumurut ma mas nabolon i tu toru ni tano, jala dang adong nanggo sahalak sian parhuta i namamboto. Ido alana asa gabe adong mas di Dolok Pinapan i.

—– Jaman sekarang ini juga sudah banyak orang berbuat seperti Lingga dan Purba ini, harta sudah menjadi segala-galanya dalam kehidupannya. Kadang, sesama saudara kandung sudah seperti orang lain. Segalanya dihitung dengan untung-ruginya. Semboyan ‘mardomu di tano rara’ acap kali kembali diperlakukan oleh yang bersaudara. Seperti perumpamaan halak hita ”dang di ho dang diau, tumagon tu begu” artinya, tidak untukmu, tidak unuk saya lebih baik dibuang. ——-

Hape nian, namartinodohon ma na undenggan, boi sahundulan di nasa ulaon, sapakkilalaan di na adong akka pardangolan, rap mekkel jala rap tangis, ido tamana.

Dalam ikatan persaudaraan, harta adalah jurang pemisah.

Kosa kata :
Ngaltek = Kondisi nasi sebelum matang benar
Dahanon = Beras
Margolle = Bertenaga
Siborutiktik = Sejenis bayam hutan dan biasanya hanya ada di pengunungan
Imbo = Siamang
Runja-runja = Ranjau dari bambu atau kayu yang tajam.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s